နှလုံးသွေးကြောဓာတ်မှန်ရိုက်ခြင်း

နှလုံးသွေးကြောဓာတ်မှန်ရိုက်ခြင်း ကို အဘယ်ကြောင့်လိုအပ်ပါသလဲ။

နှလုံးသွေးကြောဓာတ်မှန်ရိုက်ခြင်းသည် အထူးဓာတ်မှန်ရိုက်စစ်ဆေးမှုတစ်ခုဖြစ်ပါသည်။ ၎င်းသည် နှလုံးသွေးလွှတ်ကြောများကျဉ်းမြောင်းခြင်း (သို့မဟုတ်) ပိတ်ဆို့ခြင်း ဖြစ်ပေါ်သည့်နေရာနှင့် ပမာဏကို ရှာဖွေရာတွင် အသုံးပြုပါသည်။ နှလုံးသွေးကြောဓာတ်မှန်ရိုက်ခြင်းဖြင့် ဆရာဝန်အား လူနာအတွက်အသင့်လျော်ဆုံး ကုသမှုအစီအစဉ် (ဥပမာ – နှလုံးသွေးကြောချဲ့ခြင်း၊ နှလုံးသွေးကြောထောက်တိုင်ထည့်၍ နှလုံးသွေးကြောချဲ့ခြင်း၊ နှလုံသွေးကြောဖြတ်ဆက်၍ နှလုံးသွေးကြောအစားထိုးခွဲစိတ်ကုသခြင်း၊ သောက်ဆေးဖြင့်ကုသခြင်း အစရှိသဖြင့်) ကို သိရှိစေနိုင်ပါသည်။

ညွှန်ကြားချက်

• နှလုံးသွေးကြောကျဉ်းရောဂါ၏ လက္ခဏာ ဥပမာ – ရင်ဘတ်အောင့်ခြင်း (angina)
• အခြား စစ်ဆေးမှုများနှင့် မစမ်းသပ်နိုင်သည့် ရင်ဘတ်၊ မေးရိုး၊ လည်ပင်း၊ လက်မောင်းတို့ နာကျဉ်ခြင်း
• ရုတ်တရက် (သို့မဟုတ်) ပို၍ဆိုးလာသော ရင်ဘတ်အောင့်ခြင်း (unstable angina)
• နှလုံးညှစ်အားလျော့ခြင်း
• အခြား သွေးကြောရောဂါများ (သို့မဟုတ်) ရင်ခေါင်းသို့ ဒဏ်ရာရခြင်း
• ခွဲစိတ်ကုသရန်လိုအပ်သည့် နှလုံးအဆို့ရှင်ရောဂါ ဖြစ်ခြင်း
• နှလုံးနှင့်မသက်ဆိုင်သော ခွဲစိတ်မှုပြုလုပ်ရန်ရှိသော လူနာများတွင်လည်း ခွဲစိတ်ချိန်တွင် နှလုံးနှလုံးနှင့်ပတ်သက်သည့် ပြဿနာတစ်ခုခုဖြစ်နိုင်သည့် အန္တရာယ်ရှိပါက မခွဲစိတ်ခင်တွင် နှလုံးသွေးကြောဓာတ်မှန်ရိုက်ခြင်းကိုလိုအပ်နိုင်ပါသည်။

နှလုံးသွေးကြောဓာတ်မှန်ရိုက်ခြင်းသည် နောက်ဆက်တွဲဆိုးကျိုးအနည်းငယ်ရှိနိုင်သဖြင့် ခန္ဓာကိုယ်အတွင်းသို့ ထိုးသွင်းရန်မလိုအပ်သည့် စစ်ဆေးမှုများဖြစ်သည့် ECG၊ နှလုံးပုံရိပ်ဖော် စစ်ဆေးခြင်း (echocardiogram) သို့မဟုတ် ပြေးစက်ပေါ်တွင်ပြေး၍ နှလုံးစစ်ဆေးခြင်း (stress test) တို့ကို ဦးစွာ ပြုလုပ်လေ့ရှိပါသည်။

အန္တရာယ်များ (ဘေးထွက်ဆိုးကျိုးများ)

နှလုံးနှင့် သွေးကြောဆိုင်ရာ စစ်ဆေးကုစမှု လုပ်ငန်းများကဲ့သို့ပင် နှလုံးသွေးကြောဓာတ်မှန်ရိုက်ခြင်းသည် အန္တရာယ်အနည်းငယ်ရှိနိုင်ပါသည်။ ကြီးမားသော ဘေးထွက်ဆိုးကျိုးများမှာဖြစ်ခဲသော်လည်း ဖြစ်နိုင်သည့် ဘေးထွက်ဆိုးကျိုးများမှာ –

• ရုတ်တရက် နှလုံးဖောက်ခြင်း
• လေဖြတ်ခြင်း
• သွေးကြောပြွန်ပိုက်ထည့်သည့် သွေးလွှတ်ကြောအား ထိခိုက်မိခြင်း
• နှလုံးခုန်နှုန်းစည်းချက်မမှန်ခြင်း
• စစ်ဆေးမှုပြုလုပ်နေစဉ်အတွင်း အသုံးပြုသည့် သွေးကြောအရောင်ဆိုးဆေးနှင့် ဆေးဝါးများနှင့် ဓာတ်မတည့်မှု ဖြစ်ပေါ်ခြင်း
• နှလုံးကြွက်သားနှင့် သွေးလွှတ်ကြောများသို့ ဒဏ်ရာဖြစ်ခြင်း
• ရုတ်တရက်နှလုံးဖိခံရခြင်း (Cardiac tamponade)
• သွေးကြောအရောင်ဆိုးဆေးကြောင့် ကျောက်ကပ်ပျက်စီးခြင်း
• သွေးထွက်လွန်ခြင်း
• ပိုးဝင်ခြင်း
• သွေးကြောပြွန်ပိုက်ထိုးသွင်းသည့်နေရာမှ အရွယ်အစားအမျိုးမျိုးရှိသော အညိုမည်းစွဲခြင်း
• ဓာတ်ရောင်ခြည်နှင့် ထိတွေ့ခံရခြင်း

အချို့သောအခြေအနေများတွင် နှလုံးသွေးကြောဓာတ်မှန်ရိုက်ခြင်းကို အရေးပေါ်ပြုလုပ်ရတတ်ပါသည်။ များသောအားဖြင့် နှလုံးသွေးကြောဓာတ်မှန်ရိုက်ခြင်းသည် လူနာအတွက် ပြင်ဆင်ချိန်ရရန်အတွက် ကြိုတင်ရက်ချိန်းစီစဉ်ပေးပါသည်။

ပြင်ဆင်မှု

နှလုံးသွေးကြောဓာတ်မှန်ရိုက်ခြင်းကို ဆေးရုံရှိ သွေးကြောပြွန်ပိုက်ထည့်ကုသသည့် ဓာတ်ခွဲခန်းတွင် ပြုလုပ်ပါသည်။

ရက်ချိန်းရယူပြီးသော ပြင်ပလူနာများအတွက် :
ပုံမှန်အားဖြင်သင်သည် စစ်ဆေးမှုပြုလုပ်မည့်နေ့၏ မနက်ပိုင်းတွင် ဆေးရုံသို့ သွားရောက်ရပါသည်။ သင်၏ကျန်းမာရေးဝန်ထမ်းများသည် စစ်ဆေးမှုအတွက်လိုအပ်သော ညွှန်ကြားမှုများနှင့် သောက်နေသောဆေးဝါးများအကြောင်း ရှင်းပြပေးပါမည်။

• အကယ်၍ မနက်ပိုင်းတွင်စစ်ဆေးမှုပြုလုပ်ရန်ချိန်းဆိုထားပါက စစ်ဆေးမှုမလုပ်ခင်တစ်ရက်တွင် ညသန်းခေါင်နောက်ပိုင်းမှစ၍ မည်သည့် အစားအသောက်မျှ မစားမသောက်ရပါ။ သင်လက်ရှိသောက်နေသောသောက်ဆေးများအား ၎င်းတို့၏မူရင်းဆေးဗူးခွံများထဲတွင်ထည့်၍ ယူဆောင်သွားရပါမည်။ ပုံမှန်မနက်ပိုင်းသောက်ရသော သောက်ဆေးများအား သောက်သင့်/မသင့် ကို သင်၏ဆရာဝန်နှင့်တိုင်ပင်ပါ။ ဆီးချိုရှိပါက စစ်ဆေးမှုမပြုလုပ်ခင် ဆီးချိုသောက်ဆေးများနှင့် အင်ဆူလင်ထိုးဆေးတို့ ထိုးသင့်/မထိုးသင့် ကိုလည်း ဆရာဝန်အားမေးပါ။
• ကြိုတင်ရက်ချိန်း မစီစဉ်ထားသောလူနာများနှင့် မနက်ပိုင်းမှလွဲ၍ အခြားအချိန်များတွင် စစ်ဆေးမှုပြုလုပ်ရန် ချိန်းဆိုထားသူများအတွက်မူ သင်၏ကျန်းမာရေးဝန်ထမ်းများမှ အသေးစိတ် လမ်းညွှန်ချက်များပေးပါလိမ့်မည်။
• သင့်တွင် ယခင်က ပင်လယ်စာ (သို့မဟုတ်) သွေးကြောအတွင်းထိုးသွင်းသည့် သွေးကြောအရောင်ဆိုးဆေးများနှင့် ဓာတ်မတည့်မှုဖြစ်ပေါ်ဖူးပါက ဆရာဝန်အားကြိုတင်အသိပေးပါ။

စစ်ဆေးမှုပြုလုပ်နေစဉ်အတွင်း

• ဓာတ်မှန်ရိုက်သည့်စားပွဲပေါ်တွင် လူနာအား ကျောပေး၍လှဲအိပ်စေပါ။ ရင်ဘတ်နှင့်ခြေထောက်များအား စိတ်ချရစေရန် ခါးပတ်များပတ်ထားနိုင်ပါသည်။
• ဓာတ်မှန်ရိုက်သည့် ကင်မရာများသည် သင်၏ခေါင်းနှင့်ရင်ဘတ်တို့ အပေါ်မှ ပတ်လည်ရွေ့လျားပြီး ရှုထောင့်အမျိုးမျိုးမှ ဓာတ်ပုံများရိုက်ယူပါမည်။
• သင့်အား သွေးပြန်ကြောထဲသို့ ဆေးသွင်းပြွန်ပိုက်မထည့်ရသေးပါက ထိုးသွင်းပါမည်။
• စစ်ဆေးမှုပြုလုပ်နေစဉ်အတွင်း သင့်အားစိတ်အေးသက်သာစေရန် ၎င်းဆေးသွင်းပိုက်မှတစ်ဆင့် အိပ်ဆေးထိုးသွင်းပေးနိုင်ပါသည်။
• သို့သော်လည်း စစ်ဆေးမှုပြုလုပ်နေစဉ်အတွင်း ညွှန်ကြားချက်များကို လိုက်နာနိုင်စေရန် သင့်အား နိုးကြားနေစေပါမည်။
• သင့်အား အသက်ပြင်းပြင်းရှူသွင်းခိုင်းခြင်း၊ အသက်ရှူအောင့်ခိုင်းခြင်း၊ ချောင်းဆိုးခိုင်းခြင်းနှင့် လက်မောင်းအားအနေအထားမျိုးစုံထားစေခြင်း စသည့် ညွှန်ကြားချက်များပေးနိုင်ပါသည်။
• ရင်ဘတ်တွင်တပ်ထားသည့်လျှပ်ကူးပစ္စည်းများသည် စစ်ဆေးမှုပြုလုပ်နေစဉ်တစ်လျှောက်လုံး သင်၏နှလုံးအား စောင့်ကြည့်စစ်ဆေးနေပါလိမ့်မည်။ ထို့အပြင် သွေးပေါင်ချိန်စက်ဖြင့် သွေးပေါင်ချိန်အားလည်းကောင်း၊ သွေးတွင်းအောက်ဆီဂျင်တိုင်းကိရိယာမှ သွေးတွင်းအောက်ဆီဂျင်ပမာဏအားလည်းကောင်း အသီးသီး တိုင်းတာနေပါမည်။
• သင်၏သွေးကြောပြွန်ပိုက်နှင့် နှလုံးသွေးလွှတ်ကြောများထဲတွင် သွေးခဲပိတ်ဆို့မှုအား ကာကွယ်ရန်အတွက် သင့်အား သွေးခဲပျော်ဆေးများပေးထားနိုင်ပါသည်။
• သွေးလွှတ်ကြောပြွန်ပိုက်ထည့်သွင်းမည့် ပေါင်ခြံ (သို့မဟုတ်) လက်မောင်း နားတဝိုက်ရှိ အမွှေးအမျှင်အနည်းငယ်ကို ရိတ်ထုတ်ဖယ်ရှားရနိုင်ပါသည်။ ထို့နောက် ထိုနေရာအား ရေဆေး၍ ပိုးသတ်သန့်စင်ပြီးနောက် ထုံဆေးထိုးသွင်းပါမည်။
• ထိုးသွင်းမည့်နေရာအား ဓားရာတစ်ခုပေးပြီး ပလပ်စတစ်ပြွန်ပိုင်ခေါင်းအတို (အခေါင်းပေါက်) အား သင်၏ သွေးလွှတ်ကြောထဲသို့ထိုးသွင်းပါမည်။ ထို့နောက် ပြွန်ပိုက်အရှည်အား ပြွန်ပိုင်ခေါင်းပေါက်အတွင်းမှတစ်ဆင့် သွေးလွှတ်ကြောထဲသို့ထည့်ပြီး နှလုံးနှင့် နှလုံးသွေးလွှတ်ကြောများအထိရောက်အောင် ပြွန်ပိုက်ကို ဂရုတစိုက် ထည့်သွင်းပါမည်။ ထိုသို့ထည့်သွင်းခြင်းမှာ နာကျဉ်မှုမရှိပါ။ အကယ်၍ နာကျင်မှု နှင့် မသက်မသာခံစားရပါက သင်၏ကျန်းမာရေးဝန်ထမ်းများကို အကြောင်းကြားပါ။
• သွေးကြောအရောင်ဆိုးဆေး အား ပြွန်ပိုက်မှတစ်ဆင့်ထိုးသွင်းပါမည်။ ထိုအချိန်တွင် သင်၏သွေးကြောအတွင်းသို့ ရေများတိုးဝင်လာခြင်းနှင့် ပူနွေးသွားခြင်း အစရှိသည်တို့ ခံစားရနိုင်ပါသည်။
• ထိုသွေးကြောအရောင်ဆိုးဆေးသည် ဓာတ်မှန်ပုံရိပ်များထဲတွင် ရှင်းလင်းစွာမြင်သာသဖြင့် သင်၏သွေးကြောများအတွင်းဖြတ်သန်းသွားပြီးနောက်တွင် သွေးကြောထဲရှိ ပိတ်ဆို့နေသောနေရာများနှင့် သွေးကြောများအတွင်း သွေးစီးဆင်းမှုအား သင်၏ဆရာဝန်မှ အလွယ်တကူ မြင်သာနိုင်ပါသည်။
• စစ်ဆေးမှုလုပ်နေစဉ်အတွင်း သင်၏ဆရာဝန်မှ တွေ့ရှိချက်အပေါ်မူတည်ပြီး လိုအပ်ပါက ပြွန်ပိုက်မှတစ်ဆင့်ကုသမှု နည်းလမ်းများဖြစ်သည့် ပူဖောင်းဖြင့် နှလုံးသွေးကြောချဲ့ကုသခြင်း၊ နှလုံးသွေးကြောထောက်တိုင်ထည့်၍ နှလုံးသွေးကြောကျဉ်းသည့်နေရာအားချဲ့၍ ပွင့်စေခြင်းတို့ကို ပြုလုပ်နိုင်ပါသည်။

စစ်ဆေးမှုသည်အချိန်ဘယ်လောက်ကြာသလဲ။

နှလုံးသွေးကြောဓာတ်မှန်ရိုက်ခြင်းသည် အချိန် တစ်နာရီခန့်သာကြာမြင့်ပါသည်။ သို့သော် သွေးကြော ပြွန်ပိုက်မှတစ်ဆင့် ကုသမှုလုပ်ငန်းများ ပြုလုပ်ရသည့်အခြေအနေများတွင် ထိုထက်ပို၍ကြာမြင့်နိုင်ပါသည်။ စစ်ဆေးမှုမပြုလုပ်ခင်နှင့် ပြုလုပ်ပြီး စောင့်ကြည့်သည့်အချိန်တို့ သည်လည်း ထပ်ပေါင်းကြာချိန်ရှိနိုင်ပါသည်။

စစ်ဆေးပြီးချိန်တွင်

• နှလုံးသွေးကြောဓာတ်မှန်ရိုက်ခြင်းပြီးဆုံးပြီးနောက် သွေးလွှတ်ကြောပြွန်ပိုက်အား လက်မောင်း (သို့မဟုတ်) ပေါင်ခြံမှ ဆွဲထုတ်ပြီး သွေးယိုစိမ့်မှုမှကာကွယ်ရန် ပြွန်ပိုက်ထိုးသွင်းထားသည့်နေရာအား ဖိအားပြင်းပြင်းဖြင့် ၁၅ မိနစ်ခန်း တောက်လျှောက်ဖိထားပေးရပါမည်။
• ထို့နောက်သင့်အားဆက်လက်စောင့်ကြည့်ရန် ပြန်လည်ထူထောင်ရေးအခန်းသို့ ခေါ်ဆောင်သွားပါမည်။ သင်၏အခြေအနေ တည်ငြိမ်၍စိတ်ချရတော့မှသာ သင်၏မူလဆေးရုံအခန်းသို့ ပြန်လည်ခေါ်ဆောင်သွားပြီး ဆက်လက်စောင့်ကြည့် စစ်ဆေးပါမည်။ အကယ်၍ပေါင်ခြံမှ စစ်ဆေးမှုပြုလုပ်ခဲ့ရပါက သွေးယိုစိမ့်မှုအားကာကွယ်ရန် အချိန်ကြာကြာလှဲလျောင်းနေရန် လိုအပ်ပါသည်။ သို့သော်လက်မောင်းမှပြုလုပ်သူများ ထိုသို့ လုပ်ဆောင်ရန်မလိုအပ်ပါ။ ဤအချိန်အတွင်း ထိုးသွင်းထားသောနေရာကို သွေးယိုစိမ့်ခြင်းမှကာကွယ်ရန်နှင့် အမြန်ပြန်လည်သက်သာစေရန်အတွက် ဖိအားပြင်းပြင်းဖြင့်ဖိထားပေးရနိုင်ပါသည်။
• စစ်ဆေးမှုပြုလုပ်ပြီးနောက် ပြုလုပ်သည့်နေ့ (သို့မဟုတ်) ရက်အနည်းငယ်အကြာတွင် သင့်အား အိမ်ပြန်ခွင့်ပြုပါလိမ့်မည်။ (ဆေးရုံများ၏ လုပ်ထုံးလုပ်နည်းပေါ်မူတည်ပြီး ကွဲပြားနိုင်ပါသည်)
• ခန္ဓာကိုယ်ထဲရှိနေသော သွေးကြောအရောင်ဆိုးဆေးများအား စစ်ထုတ်ပစ်ရန်အတွက် အရည်များများ သောက်သုံးပါ။ အစာလည်းစတင်စားသုံးနိုင်ပါပြီ။
• ပုံမှန်နေ့တဓူဝလုပ်ငန်းဆောင်တာများဖြစ်သော ရေချိုးခြင်း၊ ခေါင်းလျှော်ခြင်း၊ အလုပ်ခွင်သို့ပြန်လည်ဝင်ရောက်ခြင်း နှင့် သောက်ဆေးများပြန်လည်သောက်သုံးခြင်းတို့ ပြန်လည် စတင်ပြုလုပ်ရန် သင့်ကျန်းမာရေးဝန်ထမ်းများနှင့် တိုင်ပင်ပါ။ ရက်အတန်ကြာ အလေးအပင်မခြင်းနှင့် ပြင်းပြင်းထန်ထန်အားကစားလုပ်ခြင်းကို ရှောင်ကြဉ်ပါ။ ပြွန်ပိုက်ထိုးသွင်းထားသောနေရာသည် အချိန်တစ်ခုအကြာအထိ ထိလျှင်နာကြဉ်ခြင်း ဖြစ်နိုင်သည့်အပြင် ညိုမည်းစွဲခြင်း၊ ဖောင်းနေခြင်းတို့လည်း ဖြစ်နိုင်ပါသည်။

အဖြေထုတ်ခြင်းနှင့် အကြံဉာဏ်ပေးခြင်း

နှလုံးသွေးကြောဓာတ်မှန်ရိုက်ခြင်းသည် သင်၏သွေးကြောများ ပြဿနာတစ်ခုခုရှိနေပါက ဆရာဝန်အား မြင်သာစေပါသည်။ ၎င်းသည် –

• သင့်တွင် အဆီခဲများကြောင့်ပိတ်ဆို့ကျဉ်းမြောင်းနေသော နှလုံးသွေးလွှတ်ကြောအရေအတွက်ကို သိရှိစေနိုင်ပါသည်။
• သင်၏သွေးကြောများထဲတွင် ပိတ်ဆို့မှုဖြစ်နေသည့်နေရာအတိအကျကို ထောက်ပြနိုင်ပါသည်။
• သင်၏သွေးကြောအတွင်း သွေးစီးဆင်းမှုမည်မျှပိတ်ဆို့နေကြောင်း မြင်သာစေပါသည်။
• နှလုံးသွေးကြောဖြတ်ဆက်ခွဲစိတ်ခြင်း ပြုလုပ်ထားပါက ရလာဒ်အား စစ်ဆေးနိုင်ပါသည်။
• သင်၏နှလုံးနှင့် သွေးကြောများအတွင်း သွေးစီးဆင်းမှုအား စစ်ဆေးနိုင်ပါသည်။
• နှလုံးသွေးကြောဓာတ်မှန်ရိုက်ခြင်း ပြုလုပ်နေစဉ်အတွင်း သွေးကြောချဲ့ကုသခြင်းနှင့် နှလုံးသွေးကြောထောက်တိုင်ထည့်၍ နှလုံးသွေးကြောချဲ့ကုသခြင်းတို့ ပြုလုပ်နိုင်သဖြင့် အခြားကုသမှုနည်းလမ်းများ ပြုလုပ်ရန်မလိုအပ်တော့အောင်လည်း ကာကွယ်ပေးပါသည်။ (နှလုံးသွေးကြောပိတ်ဆို့နေသည့်နေရာအား သွေးကြောချဲ့ကုသခြင်း)

အထက်ပါအချက်အလက်များအား ဆရာဝန်မှ သိရှိခြင်းဖြင့် သင့်အတွက် အကောင်းဆုံးကုသမှုနှင့် သင့်နှလုံးအခြေအနေ၏ အန္တရာယ်အတိမ်အနက်တို့ကို ဆုံးဖြတ်နိုင်ပါသည်။ သင့်အဖြေအပေါ်မူတည်ပြီး သင်၏ဆရာဝန်သည် ဥပမာအားဖြင့် နှလုံးသွေးလွှတ်ကြောကုသမှု၏ အောင်မြင်နိုင်ချေနှင့် အကျိုးရှိမရှိတို့ကို ဆုံးဖြတ်နိုင်ပါသည်။

အောက်ပါအခြေအနေများဖြစ်ပေါ်ပါက ဆရာဝန်အား ချက်ချင်းဆက်သွယ်ပါ –

• ပြွန်ပိုက်ထိုးသွင်းရာနေရာတွင် သွေးထွက်ခြင်း၊ အညိုမည်းစွဲခြင်းနှင့် ဖောင်းတင်းနေခြင်းတို့ အသစ်ထပ်မံဖြစ်ပေါ်ခြင်း
• ပြွန်ပိုက်ထိုးသွင်းရာနေရာတွင် နာကျင်မှုနှင့် မသက်မသာခံစားရခြင်းတို့ ပို၍ဆိုးလားခြင်း
• ပိုးဝင်သောလက္ခဏာများဖြစ်သည့် နီမြန်းခြင်း၊ သူငယ်ရည်စိမ့်ထွက်ခြင်းနှင့် အဖျားတက်ခြင်းတို့ ဖြစ်ပေါ်ခြင်း
• ပြွန်ပိုက်ထိုးသွင်းစစ်ဆေးမှုပြုလုပ်သည့် လက်/ခြေထောက်တွင် အပူချိန်နှင့်အသားရောင်တို့ ပြောင်းလဲခြင်း
• အားနည်း၍မူးမော်ခြင်း
• ရင်ဘတ်အောင့်ခြင်း (သို့မဟုတ်) အသက်ရှူကြပ်ခြင်းတို့ ခံစားရခြင်း
• ပြွန်ပိုက်ထိုးသွင်းထားသောနေရာမှ သွေးစိမ့်ထွက်ခြင်း (သို့မဟုတ်) ဖောင်းတင်းလာခြင်းတို့ဖြစ်ပေါ်လာပါက ဖိအားပြင်းပြင်းဖြင့် ထိုနေရာအားဖိထားပြီး ဆေးရုံ၏အရေးပေါ်ကျန်းမာရေးဌာနသို့ ချက်ချင်းဆက်သွယ်ပါ။

ဘန်ကောက်နှလုံးအထူကုဆေးရုံကြီးတွင် နှလုံးသွေးကြောဓာတ်မှန်ရိုက်ခြင်း

• NCDR CathPCI participant