“သန့်ရှင်းသောအစားအစာ” ဟုဆိုရာတွင် သကြား၊ အဆီနှင့် ဆားအနည်းငယ်သာ ပါဝင်ပြီး ဓာတုပစ္စည်းများ၊ တာရှည်ခံပစ္စည်းများ မပါဝင်သောကြောင့် သဘာဝအစားအစာနီးပါး ဖြစ်ပါသည်။ ထို့ကြောင့် သန့်ရှင်းစွာ စားသုံးခြင်းသည် သင့်ကျန်းမာရေးအတွက်သာမက နာတာရှည်ရောဂါများကိုပါ ကာကွယ်ပေးပြီး နှလုံးသွေးကြောစနစ်ကို အားကောင်းစေပါသည်။.
သင့်နှလုံးသွေးကြောကျန်းမာရေးအတွက် “သန့်ရှင်းစွာ စားသုံးခြင်း” ၏အကျိုးကျေးဇူးများ ၅ ချက်
- သင့်အား ကျန်းမာစေပြီး လိုက်လျောညီထွေဖြစ်အောင် ကူညီပေးသည်။ သန့်ရှင်းသောအစားအစာတွင် ဗီတာမင်ဘီ အများဆုံးပါဝင်သည့် ဟင်းသီးဟင်းရွက်မျိုးစုံပါဝင်သည်။ ၎င်းသည် သင့်ခန္ဓာကိုယ်တွင်ရှိသော ဆဲလ်များကို ပုံမှန်အလုပ်လုပ်ဖို့ ကူညီပေးပါသည်။
- သွေးတွင်းသကြားဓာတ်ကို ထိန်းညှိပေးသည်။ အချိုပွဲများ၊ သန့်စင်ထားသော အစေ့အဆန်များကဲ့သို့ ပြုပြင်ထားသော အစားအစာများကို စားသုံးခြင်းသည် သွေးတွင်းသကြားဓာတ်ကို မြင့်မားစေပြီး လူကို ပင်ပန်းစေသည်။ ထို့ကြောင့် မသန့်စင်ထားသောကာဗိုဟိုက်ဒရိတ်ကို ရွေးချယ်ရန် အကြံပြုထားသည်။ ဥပမာ – မနက်စာအတွက် အမျှင်ဓာတ်ကြွယ်ဝသော အစေ့အဆန်များကို ရွေးချယ်စားသောက်ပါ။
- နှလုံးကျန်းမာစေရန် ကူညီပေးသည်။ သန့်ရှင်းသောအစားအစာသည် သင့်အား ရေရှည်ကျန်းမာစေပြီး နှလုံးသွေးကြောဆိုင်ရာရောဂါများ ဖြစ်နိုင်ခြေကို လျှော့ချပေးသည်။ ဗီတာမင်စီ ကြွယ်ဝသော ဟင်းသီးဟင်းရွက်နှင့်သစ်သီးဝလံများသည် သင့်သွေးကြောများကို အားကောင်းစေကာ နှလုံးသွေးကြောဆိုင်ရာ ရောဂါဖြစ်နိုင်ခြေကို လျှော့ချပေးပြီး သွေးတိုးခြင်း၊ လေဖြတ်ခြင်းတို့ကိုပါ ကာကွယ်ပေးပါသည်။ ထို့အပြင် အခွံမာသီးများ၊ ထောပတ်သီးနှင့် သံလွင်ဆီများတွင် တွေ့ရှိရနိုင်သော မပြည့်ဝဆီများ ကြွယ်ဝစွာပါဝင်သည့် သန့်ရှင်းသောအစားအစာများသည် ကိုလက်စထရောအဆင့်ကို လျှော့ချပေးပြီး နှလုံးသွေးကြောဆိုင်ရာရောဂါများကို တိုက်ဖျက်ပေးနိုင်ပါသည်
- ကင်ဆာရောဂါကို ကာကွယ်ပေးပါသည်။ ပြုပြင်ထားသော အစားအစာများ၊ ပြည့်ဝဆီများ၊ ပြုပြင်ထားသော အသားများနှင့် ကြော်ထားသော အစားအစာများသည် ကင်ဆာဖြစ်နိုင်ခြေကို တိုးစေပါသည်။ တစ်ဖက်တွင်မူ အသီးအနှံနှင့် ဟင်းသီးဟင်းရွက်များ ကြွယ်ဝသော အစားအစာများသည် ကင်ဆာကို တိုက်ဖျက်ရာတွင် အထောက်အကူပြုသည့် phytonutrients နှင့် antioxidants များကို တိုးပွားစေပါသည်။
- စိတ်ကျန်းမာရေးကိုပိုမိုကောင်းမွန်စေပါသည်။ ကျန်းမာရေးနှင့် ညီညွတ်သော အစားအသောက်များသည် သင့်ခန္ဓာကိုယ်ကျန်းမာရေးအတွက်သာမက စိတ်ကျန်းမာရေးကိုပါ အထောက်အကူပြုသည့်အပြင် ပျော်ရွှင်မှုကို ဖြစ်ပေါ်စေသည့် dopamine ဓာတ်ကို တိုးပွားစေသော Omega 3 နဲ့ ဗီတာမင် B6 ကဲ့သို့သော အာဟာရဓာတ်အချို့လည်း ပါဝင်ပါသည်။ ထို့အပြင် ကော်ဖီကို ပုံမှန်သောက်သုံးပေးခြင်းဖြင့် ခေါင်းကိုက်ခြင်း၊ စိတ်ဖိစီးခြင်းနှင့် ဗိုက်နာခြင်းတို့မှ ကင်းဝေးစေပြီး တစ်နေ့ ၂ ခွက်မှ ၃ ခွက်အထိ ကန့်သတ်သောက်သုံးပါက စိတ်ကျန်းမာရေးကို ပိုမိုကောင်းမွန်စေပါသည်။ အာဟာရချို့တဲ့ခြင်းသည် စိတ်အပြောင်းအလဲနှင့် စိတ်ဓာတ်ကျခြင်းကို ဖြစ်စေနိုင်ကြောင်းကိုလည်း သတိပြုပါ။
